Ungur bókasafnsfræðingur var í morgun handtekinn á þjóðdeild Landsbókasafns þar sem hann lá afvelta, illa haldinn af blek- og papýruseitrun eftir að hafa innbyrt órynni bóka, skjala og pappírshandrita.
Meðal þess sem maðurinn lagði sér til munns voru frumútgáfur verka Halldórs Laxness, Gunnars Gunnarssonar og Eðvarðs Ingólfssonar og er talið með ólíkindum hvað maðurinn náði að innbyrða áður en hann gafst upp.
Ekki er vitað hvað manninum gekk til, en flestir sem Baggalútur hafði tal af vegna málsins voru sammála um að bókasafnsfræðingar væru almennt afar óútreiknanlegir og mjög skrýtnir.
Tónleikahaldarar athugið!
Erum að taka við bókunum. Ekkert of bissí ennþá. Verðum bráðum komnir með söngvara.
Tommy Lee.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.