Stór skógarbjörn leikur lausum hala í Breiðholti um þessar mundir og hefur gert íbúum hvefisins lífið leitt. Að sögn lögreglu er hér um að ræða fyrrum gæludýr þekkts fjölmiðlamanns, en dýrið hefur um langt skeið verið vistað á Reykjalundi sökum mikilla geðsveiflna.
Um jólin náði svo björninn að sleppa og hefur síðan ráfað um Breiðholtið og brotist inn í söluturna til að ná sér í æti. Dýrið er afar sólgið í maltöl og lakkrís, en jafnframt sérlega skapvont og er vegfarendum bent á að fara um hverfið með ítrustu gát.
Útfrymi
Þarf vegna lífstjörnuflutninga að losa mig við mikið magn útfrymis. Tilboð óskast.
Gísli miðill.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.