Tvær samkynhneigðar lesbíur, Þuríður og Bára, gengur formlega frá ættleiðingu hollenska tuskuapans Bobba í morgun. Að sögn Þuríðar gekk ættleiðingarferlið hratt og örugglega fyrir sig, ef undan eru skilin mótmæli fulltrúa ýmissa trúfélaga, sem grýttu nýbakaða fjölskylduna með útrunnu matarkexi og mygluosti - til að „minna á þjáningar krists“.
„Jájá, við Bára bara skutluðumst í Leikbæ um helgina og keyptum Bobba á útsölu og erum bara orðin fjölskylda tveim dögum seinna. Segiði svo að kerfið virki ekki“, sagði Þuríður himinlifandi í samtali við Baggalút.
Emúi
vanaður emúi, 14 vetra, óskar eftir að komast á gott heimili. Gegnir nafninu Erlingur. Afgreiðsla vísar á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.