Tveir arkitektar, Maggi og Siggi, hafa að beiðni forsætisráðherra gert tillögur að framtíðarskipulagi Þingvallasvæðisins. Arkitektarnir leggja til að Almannagjá verði rifin - enda of dýrt að gera hana upp svo sómi sé að.
„Við viljum leggja í framtíðinni megináherslu á næg bílastæði í þjóðgarðinum, það má segja að það sé svona leiðarljós okkar í þessari hönnunarvinnu. Svo þarf líka að rýma fyrir almennilegu tjaldstæði þannig að markmið stjórnvalda um að koma tjaldstæðinu á Þingvöllum á heimsminjaskrá fyrir 2010 náist“, sagði Siggi í samtali við Baggalút
Til að rýma fyrir nægum bílastæðum og stærsta tjaldstæði Evrópu þarf að rífa Almannagjá, en hún var sem kunnugt er reist af írskum þrælum á árunum 899-902 og var á þeim tíma lengsta mannvirki Norður-Evrópu. Hún er því nokkuð komin til ára sinna og að sögn Sigga hefur viðhaldi verið mjög ábótavant: „Já, það var gert við einhverjar alkalískemmdir þarna fyrir Lýðveldishátíðina 1944 og svo var gert við þakið fyrir kristnihátíðina árið 2000 - en síðan ekki söguna meir. Þannig að ástand Almannagjár er vægast sagt slæmt, reyndar tók til starfa byggingarnefnd sem átti að vinna að viðgerðum en hún lognaðist útaf þegar nefndarformaðurinn var dæmdur í fangelsi fyrir nokkrum árum. Það er ekkert annað að gera en að rífa þetta drasl, það er alltof dýrt að púkka meira uppá þetta“, sagði Siggi.
Sígaretta
lítið reykt, með dálitlum fölrauðum varalit á filter fæst fyrir lítið. Fyrstir koma, fyrstir fá.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.