Nýr raunveruleikaþáttur Sinfóníuhljómsveitar Íslands, sem ætlað var að létta ímynd sveitarinnar og laða að yngri og fjölbreyttari áheyrendahóp, hefur verið sleginn af eftir aðeins einn þátt.
Að sögn kunnugra spilaði allt saman, nafn þáttarins, Symphonic superstar: SINFÓ, þótti óþjált, sýningartíminn, kl. 2 eftir miðnætti á sjónvarpsstöðinni Omega+ þótti óheppilegur, keppendur, þ.e.a.s. þeir tveir sem skráðu sig, þóttu einkar óspennandi og eini áhorfandinn að þættinum sem gaf sig fram í fjölmiðlakönnun Gallup sagðist einfaldlega ekki finna til neinnar samkenndar með baráttu túbuleikara fyrir sæti í hljómsveitinni.
Vottar Jehóva
Vorum að fá nýja sérstyrkta leðurskó með stáltá, tilvaldir í gættina.
Skóbúð Skafta.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.