Ólafur Guðnason, kvikmyndagerðarmaður og fyrrum ljónatemjari leitar nú logandi ljósi að fjármagni í nýjustu mynd sína, sem hann segir endurgerð á hinni klassísku Titanic frá árinu 1997.
„Mér finnst bara kominn tími á að dusta rykið af þessari klassísku mynd og kynna hana fyrir nýjum hópi áhorfenda,“ sagði Ólafur vongóður, en hann hyggst nota sér nútíma tölvutækni til að gera myndina raunverulegri og nútímalegri - og stendur jafnvel til að endurbyggja skipið fornfræga í tölvu, en það veltur á því hvort móðir hans lánar honum „fyrir nýju teikniforriti“.
Þetta er ekki í fyrsta sinn sem Ólafur ræðst í slíkt verkefni því í fyrra endurgerði hann allar Indiana Jones myndirnar og var meir að segja svo stálheppinn að fá sjálfan Harrison Ford, sem hafði villst illa í Breiðholti einn morguninn, til að taka að sér hlutverk Dr. Elsu Schneider í mynd númer þrjú.
Allt í íslenska kúrinn
Flot, garnir, mör og appelsín.
Kjörbúðin Karítas
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.