Einar Einarsson, matsveinn og áhugamaður um stærðfræði, rúmfræði, hornafræði og algebru kveðst hafa fundið síðasta aukastafinn í pí.
Hingað til hefur þessi síðasti aukastafur ekki fundist þó stórvirkar ofurtölvur gangi dag og nótt í þeim tilgangi einum og því hlýtur þetta að teljast nokkuð merkilegt afrek hjá Einari.
Hann gerir þó lítið úr þessu öllu og segir þetta hafa verið lítið mál. „Ég meina, eftir að hafa skoðað þetta í smá tíma komst ég að því, mér til mikillar furðu að þetta eru ekki nema sirka 9 stafir, á bilinu 1-9, sem koma til greina“ sagði Einar og hvaðst þora að éta hattinn sinn upp á að þetta væri einn þeirra.
Þegar blaðamaður spurði Einar hvort stafurinn þyrfti ekki að vera núll, til að dæmið gengi upp, brosti hann góðlátlega og sagðist sjálfur hafa meiri trú á 4, ef hann yrði að velja einhvern einn.
Ertu að opna kirkju?
Eigum í miklu úrvali hempur, kerti, krossa, altari og orgel.
Minnum einnig á vinsælu prestaleiguna okkar.
Kirkjuval – Garðatorgi.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.