Lögregluyfirvöldum hafa undanfarna daga borist kvartanir íbúa í Fossvogi vegna hljóðfæradólgs sem gerir fólki á svæðinu lífið leitt með því að ota að þeim hljóðfærum - og fleira í þeim dúr.
„Þetta er afskaplega einkennilegur maður, afskaplega,“ sagði Bára Thomsen, frú í spjalli við Baggalút. „Ég hef tvisvar lent í honum, í fyrra skiptið átti ég mér einskis ills von og 'skoðaði inn í trompettið' hans, eins og hann bauð mér - en í seinna skiptið þegar hann vildi að ég mundi 'blása í franska hornið' sitt - þá var mér nóg boðið.“
Lögregla leitar nú dólgsins en líklegt þykir að hann tengist Sinfóníuhljómsveit Íslands, þar sem hann virðist hafa ótakmarkað aðgengi að furðulegustu hljóðfærum, s.s. óbó og fagotti, sem ekki er vitað til að aðrir noti.
Til sölu
Vinsælt enskt knattspyrnulið í góðum rekstri. Einnig á sama stað tónlistarhús, óklárað.
Afgreiðsla vísar á
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.