„Það er rétt, við létum loksins verða af þessu,“ sagði Hermann Gortsson, auglýsingateiknari, hróðugur en hann og eiginkona hans Guðlaug skelltu sér um helgina í kynskiptiaðgerð - fyrst íslenskra hjóna, svo vitað sé.
„Þetta stóð raunar alltaf til, en við gerðum aldrei neitt í því - þannig. Létum okkur bara nægja klæðskipti og svoleiðis. Þetta er auðvitað rándýrt,“ bætti Hermann við og telur ólíklegt að þau hefðu látið verða af þessu hefðu þau ekki rekið augun í sérstakt tveir fyrir einn tilboð á Landsspítala-Háskólasjúkrahúsi.
„Og ef okkur líkar þetta ekki getum við bara látið breyta okkur aftur. Það er ekkert mál, skilst mér.“
Nærgætin
stúlka óskast á gott heimili í Vesturbænum. Þarf að hafa reynslu af umönnun og umhirðu urðarkatta.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.