Ungur bókmenntafræðingur sturlaðist í gærkvöld eftir að hann fyrir tilviljun komst í innsiglað handrit að nýrri alfræðibók Baggalúts, sem heitir Sannleikurinn um Ísland og verður gefin út af Almenna bókafélaginu innan skamms. Maðurinn gekk berserksgang í Árnagarði, þar sem hann kennir inngangskúrs í bókmenntafræði og át m.a. bókina Lyriske Strukturer, pakka af töflukrít og glærupenna auk þess sem hann í mesta æðinu kvaðst vera systir Snorra Sturlusonar og maðurinn sem fann upp jóga.
Bókmenntafræðingurinn er afar illa haldinn, en talið er að hann hafi náð að lesa þrjá fyrstu kafla bókarinnar. Honum er haldið sofandi í útibúi Landspítala háskólasjúkrahúss við Kleppsveg.
Gefins
Leðurblaka. Kassavön og kelin.
A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.