Hæstiréttur dæmdi í dag flestöll ummæli Gárunganna svokölluðu, Sven og Bengt Torfasona, dauð og ómerk, en þeir hafa í gegnum tíðina látið gamminn geisa um hin ýmsu málefni og ekki alltaf gætt tungu sinnar.
Of langt mál væri að telja hér upp allar þær aðdróttanir, gífuryrði, útúrsnúninga, gróusögur og uppnefni sem Gárungarnir hafa látið frá sér fara. Nægir að nefna þegar þeir kölluðu ónefndan fyrrverandi biskup loðalbinóasveskju og gáfu sterklega í skyn að ríkisstjórn lýðveldisins væri að megninu til skipuð náttúrulausum búðarhnuplurum og kynlífssjúkum heróínfíklum.
Til allrar hamingju eru þessi ummæli öll nú ómerk og fallin í gleymskunar dá.
Leðurhommar til sjávar og sveita!
Leðurjakkar, leðurbuxur, leðurstígvél, leðurpeysur, leðursokkar, leðurtreflar.
Verslunin Kjörver
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.