Þormóður Eysteinz trésmiður sprakk í loft upp á dansskemmtun Hrafnistu í gærkvöld eftir að hafa - eftir því sem sjónarvottar segja - "reynt við allt sem hreyfðist." Að sögn þeirra sem til þekkja hefur Þormóður ávallt stundað þessa iðju af kappi, fyrrum konum hans sautján til mikils ama.
Óvenjulegt þykir að sjá til Þormóðs á Hrafnistu, en hingað til hefur hann mestmegnis haldið sig á Grund. Gekk honum óvenju illa að fá einhverja viðstaddra til lags við sig og brást hann því á við á fyrrgreindan hátt eftir rúmlega fjögurra klukkustunda törn.
Mjög óvíst er að Þormóður hafi lifað sprenginguna af í þetta skiptið, en enn á eftir að safna honum saman og telja læknar því of snemmt að segja til um það með vissu.
Fangar
Ekki eyða tímanum til einskis.
Skemmtileg námskeið að hefjast í viðskiptafræði, efnafræði, lásasmíði og bókfærslu.
Endurmenntastofnun.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.