Fyrirtæki nokkurt hér í bæ hefur beðið Baggalút að koma á framfæri eftirfarandi tilkynningu:
"Verið dugleg að horfa upp í loftið á morgun, því þá mun vera á ferð flugvél sem skrifar í skýin upplýsingar um vefslóð, þar sem tilkynnt verður að í útvarpinu síðar um daginn muni heyrast auglýsing sem auglýsir auglýsingu sem kemur til með að birtast í öllum helstu dagblöðum landsins, en þar eru landsmenn hvattir til að fylgjast grannt með sjónvarpsauglýsingu frá okkur þar sem auglýst verður ný þjónusta sem við höfum upp á að bjóða fyrir áhugasama."
Bleik ský
Lítið notuð bleik ský til sölu. Svífa 5–10 metra, halda 100 kg.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.