Á "fréttavefnum" Pressunni er í dag ráðist harkalega á Fannar Númason Fannsker, pistlahöfund Baggalúts. Höfundur greinarinnar (sem af augljósum ástæðum lætur nafns síns ekki getið) vænir þar Fannar og ritstjórn Baggalúts um "græskulaust gaman" og gerir að engu þá einlægu fréttaumfjöllun sem Baggalútur hefur staðið fyrir alla tíð.
Ritstjórn Baggalúts lætur ekki draga sig niður í það svað að viðra álit sitt á Pressunni sem alvarlegum fréttamiðli, en lætur nægja að benda lesendum á hvaða nafn þessi miðill valdi sér og lætur þá svo um að dæma.
Ritstjórn sárnar sú meðferð sem ýmsir fréttamiðlar hafa beitt Baggalút og virðist sem slíkum árásum ætli seint að linna, nægir að nefna fólskulega árás Fréttablaðsins á dögunum, svo og niðrandi athugasemd við tengil frá vefnum tilveran.is.
Til sölu
Tveir fallegir verðlaunagripir úr lituðu gleri og steini. Lítið notaðir. Ritstj. Baggalúts.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.