"..þetta er bara sirka nákvæmlega það sem ég bjóst við," sagði dr. Tryggvi Leósson, félagsfræðingur, en hann hefur undanfarin 15 ár sérhæft sig í gæðamati á verslunarmiðstöðvum. "..Kringlan er sennilega ein af tíu leiðinlegustu verslunarkjörnum í heiminum í dag, rétt á eftir Megamall Grande í Portúgal. Hér kemur manni í raun ekkert á óvart, búðirnar eru litlausar og ófrumlegar, maturinn óætur, lýsingin fyrir neðan allar hellur og tónlistarvalið gersamlega óþolandi."
Tryggvi segir þetta óneitanlega vonbrigði, því hann hafi frá upphafi borið miklar væntingar til Kringlunnar og telur að afstýra hefði mátt þessum ósköpum ef hann hefði á sínum tíma fengið þar inni með verslun, en honum var hafnað á þeim forsendum að ekki væri markaður fyrir erótísk gæludýraföt.
Togarasjómenn athugið!
Dönsku blússurnar komnar. Margar stærðir.
Vélasala Einars.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.