Í morgun hófst fyrsti þingflokksfundur Samfylkingarinnar eftir nýafstaðnar kosningar. Þetta er einnig í fyrsta sinn sem formaður flokksins, Össur Skarphéðinsson, sést opinberlega síðan seint á sunnudagskvöld. Hann þykir hafa lagt nokkuð af síðan þá, sem er óvenjulegt sé tekið mið af því að hann hefur verið í stanslausri megrun frá fermingu, án árangurs.
Gleði ríkti meðal fundargesta enda að baki glæsilegur kosningasigur. "Þetta er stór stund fyrir íslenska jafnaðarmenn," sagði formaðurinn stoltur. "..og mjög ánægjulegt að sjá þingflokkinn stækka, enda erfitt fyrir flest af þessu fólki að fá fasta atvinnu á almennum vinnumarkaði."
Eitt setti þó skugga á fundarhöldin, en það var fjarvera Ingibjargar Sólrúnar Gísladóttur, fyrrverandi borgarstjóra, sem átti stærstan hlut í fylgisaukningunni - en ekkert hefur heyrst frá henni síðan hún varð atvinnulaus um helgina.
Á að mótmæla?
Heykvíslar, tjara, fiður og lambhússettur í miklu úrvali. Einnig auðmannavúdúdúkkurnar vinsælu.
Mótmælaþjónusta Magga.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.