Hlérgunnur Grímsdóttir, ljósmóðir úr Skáleyjum, er nú í haldi belgísku lögreglunnar grunuð um að hafa sökkt 200 ára gömlu klaustri í heilu lagi, ásamt öllum innanstokksmunum, 81 nunnu, garðyrkjumanni og tveimur fressköttum.
Hlérgunnur, sem er annálaður trúleysingi, er talin hafa gengið vísvitandi inn í klaustrið vitandi hvaða afleiðingar það myndi hafa, en hún hefur oftsinnis áður sökkt trúarlegum byggingum og minnismerkjum bæði hér heima og erlendis.
"Hún er bara svona ofsalega trúlaus," sagði ákaflega skilningsrík vinkona hennar í stuttu samtali við Baggalút. "..hún þarf ekki nema koma nálægt kirkju eða presti - þá fer allt af stað, kirkjurnar ýmist sökkva eða brenna og prestsræflarnir flestir fuðra upp eða breytast í saltstólpa. Þetta er náttúrulega voðalega skrítið."
Uppistöðulón
ónotað, fæst gefins. Lekur. Afgreiðsla vísar á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.