Kanadískur flökkukondór hefur hreiðrað um sig í einu af fjölmörgum trjám Perlunnar í Reykjavík. Starfsmenn urðu varir við fuglinn í vikunni þar sem hann hafði hnuplað ávöxtum úr matsölunni og skemmti sér við að láta þau falla niður á gesti Perlunnar.
"Þetta er mjög furðulegt dýr," segir Olga Símonardóttir, starfsmaður og áhugakona um furðuleg dýr. "..honum virðist sérlega uppsigað við dökkhærða karlmenn, sérstaklega þá sem hafa yfirskegg. Svo er hann líka vita heyrnarlaus."
Líklegt þykir að kondórinn hafi strokið frá varnarliðinu á Keflavíkurflugvelli, sem undanfarið hefur leitað leiða til að nýta handsprengjur sem hingað voru sendar fyrir misskilning meðan á þorskastríðinu stóð.
Til sölu
Nokkrir erlendir fjárfestingabankar, innlend fjármögnunarfyrirtæki, fasteignir (sumar ókláraðar) og ýmis lítið notuð verðbréf.
Einnig á sama stað tryggingafélög (flest því sem næst gjaldþrota).
Fjármálaeftirlitið
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.