Í grunsamlega löngu viðtali Baggalúts við Davíð Oddsson í morgun, kemur fram að Jón Ásgeir Í'Bónus, sonur hins miskunnarlausa viðskiptahákarls, Jóhannesar Í'Bónus, hafi lagt til við stjórnarformann Baugs að réttast væri "að flengja forsætisráðherra á beran bossann".
"Þá sagði ég [Davíð sko - innsk. blm.]: Maður sem getur hugsað sér að orða það að bera bossann á forsætisráðherra, á hverjum öðrum er hann búinn að bera bossann?"
Davíð kvaðst hafa sofið illa næturnar á eftir af ótta við menn eins og Jón Í'Bónus og hans líka, sem víla ekki fyrir sér í krafti auðvalds síns að bera bossann á ráðamönnum landsins. Vegna þessa sendi hann Ríkislögreglustjóra SMS-skeyti þar sem segir orðrétt: "Hjálp - J í B vill bera á mér bossann!"
Hann fékk eftirfarandi svar um hæl: "*LOL*", og taldi þá málið vera komið í réttan farveg.
UNGUR MAÐUR
með yfirgripsmikla þekkingu á kjarnaofnum, óskar eftir starfi úti á landi.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.