Ari Guðmannsson, 43 ára járnsmiður úr Hafnarfirði, komst á dögunum í Heimsmetabók Guinness fyrir að vera minnsti maður í heimi, eftir að Rico Gonzalez frá Mexico lést sviplega á dögunum í miklum troðningi í anddyri kvikmyndahúss.
"Þetta er náttúrulega ekkert auðvelt líf, þó það geti verið mjög gefandi," sagði Ari í mjög stuttu spjalli við Baggalút. "Þegar ég var krakki voru foreldrar mínir alltaf að týna mér og ég var í stöðugri hættu með að vera étinn af hundinum. Á móti kemur að þegar fólk sér mig á annað borð fæ ég endalausa athygli."
Verst finnst honum þó að vera ókvæntur og barnlaus, "...en þegar ég fór að spá í stelpur á sínum tíma komst ég fljótt að því að stærð skiptir víst máli," segir Ari að lokum.
Tapað fundið
Hvítt og móbrúnt lamadýr týndist einhversstaðar milli Hveragerðis og Eyrarbakka um helgina. Svarar nafninu Hermann. Fundarlaun. Skilvís finnandi hafi samband við afgreiðslu Baggalúts.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.