Bandarískir sérsveitarmenn voru hársbreidd frá því að hafa hendur í hári Bin Laden gærkvöldi, þegar þeir ruddust inn á þekktan karókíklúbb í nágrenni Kabúl.
Laden hafði verið þar lungann úr kvöldinu ásamt vinum sínum þar sem þeir sungu saman "...og fengu sér nokkra öllara," eins og eigandi staðarins komst að orði.
"Hr. Laden var í miklu stuði og fór á kostum í lögum eins og 'Fly on the wings of love', 'If you don't know me by now' og 'Poison' með Alice Cooper. Loks eftir mikið uppklapp lét hann til leiðast og söng 'New York, New York' með tilþrifum."
Bin Laden komst undan á flótta og hafði á brott með sér dágott plötusafn staðarins - þ.á.m. heildarútgáfu af lögum Barbru Streisand, sem hann ku hafa mikið dálæti á.
Biskup
á besta aldri, reyklaus, óskar eftir að kynnast flotaforingja. Með nánari kynni í huga.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.