Formaður Grós, samtaka um umhverfisvernd og friðun fallvatna, hefur kært Vigdísi Finnbogadóttur til lögreglu og sakar hana um að hafa vísvitandi og af ásettu ráði ekið yfir sig á bílastæði við Neskirkju um helgina vegna þess að hann neitaði að greiða henni sérstakt "verndargjald".
Vigdís er "verndari" fjölmargra samtaka og stofnana og hefur því verið haldið fram lengi að hún innheimti "verndargjald" eins og tíðkast meðal "athafnamanna" víða um heim. Vigdís neitaði ásökunum formannsins í spjalli við Baggalút í morgun, en vildi taka það fram að það væri þó merkileg tilviljun að þau samtök sem hafa hana sem verndara lendi aldrei í hremmingum sem þessum.
Til sölu
Vorum að fá í einkasölu nokkra skemmtilega fjárfestingarbanka. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.