Una Unnarsdóttir, sminka, lauk á dögunum prófi - fyrst kvenna. Þykir þetta marka nokkur tímamót þar sem Íslendingar slást nú í hóp þeirra vesturlandabúa sem gefa konum færi á menntun - að uppfylltum vissum skilyrðum.
Prófið sem Una lauk var úr grunndeild snyrtingar, við sameinaða snyrtiskólann í Hveragerði og fjallaði lokaverkefni hennar um "ælæner í sögulegu samhengi". Baggalútur óskar Unu og konum hjartanlega til hamingju.
Fuglaflensulyf!
Á fyrirliggjandi mikið magn af heimagerðu lyfi við fuglaflensu. Hefur reynst vel gegn rjúpnakvefi og gaukssleni. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.