Viðskiptamógúllinn Jón Ólafsson lét í gær gullhúða sig og fjölskyldu sína ásamt lögmanni sínum og nánustu samstarfsmönnum. Vill hann með því vekja athygli á því óréttlæti sem ríkir einstaklingar eru beittir af skattayfirvöldum.
"Maður má ekki skríða yfir nokkra milljarða í tekjur án þess að allt verði vitlaust, það er farið með mann eins og ótíndan glæpamann, mér er einfaldlega nóg boðið," sagði Jón, með dálitlum erfiðismunum gegnum 3 cm lag af 24 karata gulli.
Jón hefur hvatt ýmsa auðkýfinga til að ljá baráttu sinni lið og hafa margir lýst yfir áhuga, m.a. Michael Jackson, sem ku hafa verið mjög hrifinn af glitstigi húðunarinnar.
Drusla!
Ábyrgðarlaus drusla á þrítugsaldri óskar eftir að kynnast karlmanni á fertugsaldri, með nánari kynni í huga. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.