Rósa Helgadóttir, nemi í hjúkrunarfræði, varð fyrir því óláni seint í gærkvöldi að festa ennið á sér við annað tilverustig.
"..ég var að koma heim, en hrasaði í innkeyrslunni og einhvernveginn náði að rjúfa skilin milli okkar veruleika og annars sem er talsvert minni en liggur þvert á okkar heim."
Sérfræðingar eru agndofa yfir atburðinum, en þetta mun aðeins einu sinni hafa gerst áður, en á 17. öld festi svartur flækingsköttur veiðihár og loppu í vídd þar sem mýs réðu ríkjum og olli miklum usla.
Óttast er að Rósa muni missa hluta af hársverði sínum þegar reynt verður að skilja hana frá nýju víddinni, en þegar er farið að tilbiðja einstaka hárlokka hennar þeim megin.
Viltu slaka á eftir erfiðan dag í bankanum?
Líttu við og slakaðu á í góðra vina hópi. Alltaf heitt á könnunni. Athugið að almenningur er ekki velkominn.
Stjórnarráðið – sælureitur í alfaraleið
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.