Flugleiðir hafa tekið upp þá nýbreytni að bjóða upp á ódýr fargjöld. Til að byrja með verður einungis um örfá sæti að ræða í tíunda hverju flugi til Lundúnaborgar. Að sögn Sigurðar Helgasonar, forstjóra Flugleiða, kemur vel til greina að fjölga ódýrum sætum komi þessi tilraun vel út. "Við erum búnir að selja allar flugvélarnar okkar og ég hef ekki fengið bónus í 3 mánuði. Satt best að segja er ég orðinn örvæntingarfullur". Um er að ræða 0.05% verðlækkun, en á móti kemur minni þjónusta. Engar veitingar verða á leiðinni auk þess sem bil milli sætaraða verður minnkað í 2 cm. Farþegum í ódýrum sætum verður auk þess gert að yfirgefa flugvélina í Hereford (250 mílur frá London) en þar verður millilent sérstaklega til að lækka flugvallarskatta þeirra farþega sem ekki tíma að borga full fargjöld. Nýju miðarnir verða seldir á bilinu 200.000-220.000 kr, en til samanburðar má nefna að 200 fermetra einbýlishús á Bolungarvík kostar um 250.000.
Tilkynning frá Stofnun Árna Magnússonar í íslenskum fræðum
Í anda þess þegar Bandaríkjastjórn breytti nafni franskra kartaflna í "Frelsiskartöflur" hefur nú verið ákveðið að enskur morgunverður skuli héðan í frá heita "Skítalabbatjallaógeðiskornflex"
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.