Ekkert miðar í leit bandarískra löggæslumanna að leyniskyttu sem talin er hafa myrt og sært á annan tug manna síðustu daga.
"Þetta er mjög snúið mál," sagði talsmaður FBI í símaviðtali við Baggalút. "..sko, málið er að morðinginn liggur alltaf í leyni þegar hann er að drepa og svoleiðis og það flækir málin ofsalega því það segir sig jú sjálft að ef einhver liggur í leyni þá er rosalega erfitt að finna hann."
Lögregla hefur þó ekki teljandi áhyggjur af því að morðinginn finnist ekki "..ég meina, ef við verðum ekki búnir að finna hann fyrir helgi þá ráðumst við bara inn í Írak í staðinn."
Mannætur athugið!
Námskeiðið: „hættið að naga neglurnar á þremur dögum“ hefst á nýjan leik í þessum mánuði. Takmarkaður fjöldi þátttakenda.
FÍM
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.