George Bush, bandaríkjaforseti, hefur loks opinberað sannanir fyrir því að Írakar búi yfir gereyðingavopnum. Um er að ræða gervihnattarmynd sem bandaríska leyniþjónustan tók fyrir um 3 mánuðum. Vopnið, sem hefur hlotið vinnuheitið "Donkey al Kamekaze" mun vera erfðabeyttur múlasni sem getur flogið allt að 3000 km samfleytt með allt að þriggja tonna sprengjur. "Þessi óhuggulega mynd sýnir hverslags illmenni við eigum við að stríða", sagði Bush á blaðamannafundi í morgun. Búast má við að Öryggisráð SÞ fundi um málið á næstu dögum.
Burðardýr
vantar til að flytja morfín og kólalauf til meginlands Evrópu. Þurfa að hafa aðgang að eigin bifreið. Ágæt þóknun. Afgr. vísar á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.