Illugi Bjarnason, nemi, hefur fengið sig fullsaddan á háðsglósum skólafélaganna, en hann er bæði örvhentur og með gleraugu auk þess sem hann er afskaplega illa tenntur.
Hann hefur því hannað nýtt og afar fullkomið sýklavopn sem að hans sögn á eftir að valda byltingu í herferðinni gegn einelti.
„Þetta er enn í þróun, en ég hef prófað þetta í félagsmiðstöðvum og árangurinn er frábær. Á innan við klukkustund verða fallegustu börn afmynduð í framan af bólum og ég veit um allavega þrjú dæmi þar sem tennur hafa skekkst verulega,“ sagði ungi vísindamaðurinn hróðugur. Hann á enn eftir að bæta inn virkni fyrir lömun hrekkjusvína og lykthvetjandi rotgerlum fyrir stelpur.
Jón!
Mér þykir vænt um þig.
Ö.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.