Baggalútur

– Dagbók –

Erfðabreyttar lífverur

Enter

Einhverjir apakettir flenniauglýsa núna spurninguna: Vilt þú sleppa erfðabreyttum lífverum út í íslenska náttúru?

Auðvitað.

Ég held raunar að ég vilji fátt fremur.

Ég er nefnilega ekki frá því að nokkrar hressar kengúrukindur, flamengólóur, fáeinir dvergvaxnir loðselir og dálítill slæðingur af mannætumosa myndu gera heilmikið fyrir mig. Já, og blóðþyrstar vígarjúpur.

Það er ekki eins og maður pissi ítrekað á sig af spenningi yfir íslensku dýralífi svona dags daglega.

9/6/09 • • Lesbók

Afturför

Snorri Sturluson

Helvítis vesen að það sé ekki hægt að vega menn lengur hér á þessu skeri. Það var alltaf fín leið til að losna við hina og þess blábjána, sem héldu að þeir væru eitthvað.

5/11/08 •

• Þjóðblogg

Nýtt verk

Jón Leifs

Samdi litla sæta vögguvísu í nótt - ljúfsárt og tregaþrungið verk.

Er að spá í að útsetja það fyrir tvær baujur, rafmagnstannbursta og hænsnakór.

13/3/08 •

• Þjóðblogg

Ó, Sturla mín

Enter

Heyrðu mig nú.

Hvað heldur þú þig eiginlega komast upp með það lengi að smyrja öllu þínu malbiki skammlaust eftir úttroðnum bakraufum landsbyggðarinnar meðan þorri þjóðarinnar situr fastur í endalitlum bílröðum á suðvesturhorninu og hreyfist ekki úr stað?

Það þarf nú déskotakornið ekki mikið til að við auðmjúkir þrælar þínir fáum komist lifandi, þurr og sæmilega heil á geðsmunum frá Sæbrautinni yfir í Grafarvoginn. Flest myndi hjálpa Sturla mín. Í alvöru. Þó ekki væri nema að fá tvo planka þarna yfir, eða lítinn kláf.

Og hvernig er með þessi margumræddu mislægu gatnamót í Kringlumýrinni? Þarf ég virkilega að draga hæstvirtan ráðherra þarna niðureftir á hægri eyrnasneplinum og tjóðra niður á gatnamótunum miðjum til að það kvikni á perunni?

Þú veist hvað verið er að tala um, er það ekki Sturla mín? Eða ertu enn og aftur að hygla déskotans dreifingjunum sem komu þér á koppinn? Það væri svosem eftir öðru.

Það er ekki nóg með að þetta ofdekraða útnárahyski þurfi heilan flugvöll í miðbæ Reykjavíkur til að komast sem fyrst í Kolaportið, heldur þarf það nú líka að geta brunað gegnum annan hvern hól, helst á tvöfaldri akgrein — á flóttanum suður.

Ég veit ekki betur en að í þau fáu skipti sem yfirleitt er hægt að brúka þessa margborguðu og sítroðnu útírassgatsslóða, þ.e.a.s. þegar þeir eru ekki á kafi undir vatni, aur, snjó - eða hreinlega týndir — þá komist þeir fáu skrjóðar sem það þurfa ágætlega milli staða.

En nei. Hæstvirtur ráðherra getur vitanlega ekki hugsað sér að það komi rispa á alla fínu nýkeyptu snæfells- og hnappdælsku jeppana af einhverjum sjoppulegum malarvegi. Onei. Það verður að malbika hvern einasta helvítis kindaslóða og leggja göng um hverja bévítans þúfu sem fyrir verður á leið jeppaflota íslenska lýðveldisins upp á jökul eða ofan í næsta gljúfur. Skárra væri það nú.

Á meðan situr höfuðborgarhyskið staðdeyft og starir dáleitt í bremsuljós náungans. Helvíti sátt bara.

Húrra fyrir því, Sturla mín. Húrra fyrir þér.

5/4/05 • • Lesbók

Baggalútur er hýstur með stolti hjá SKÝRR

1, 2, 3 ... 168, 169, 170

Enter – Forystugrein

Musteri Orkuveitunnar

Enter – Dagbók

1 plata á 1 mínútu

Númi Fannsker – Forystugrein

Interpol

Enter – Gagnrýni

Rómeó og Júlía

Enter – Forystugrein

Tino Martini kynnir Ísland

Númi Fannsker – Forystugrein

Hin mörgu nöfn Sigurðar Einarssonar

Enter – Forystugrein

Drög að siðareglum fyrir forseta lýðveldisins Íslands

Enter – Dagbók

Upprifjelsi

Enter – Forystugrein

Aðför að Hrafni

Enter – Dagbók

Strípuð hugmynd

1, 2, 3 ... 168, 169, 170

Í skóginum

Enter

Óþolandi þegar orðaröð brenglast í munnlegri geymd.

kofi stóð í skóginum
jólasveinn sat einn við gluggann
lítið héraskinn, sem vildi komast inn, kom
"ég treysti á þig jólasveinn,
því skýtur veiðimaður mig þá?"

"komdu hér litla rasskinn, ég er vinur þinn"

17/2/03 •

Klæðskiptingar

Munið skiptimarkaðinn í Kolaportinu.

Greiðendur afnotagjalda RÚV

ekki missa af táknmálsfréttum. Nýjar þulur. Ný tákn.

Ríkisútvarpið – Sjónvarp

Til sölu

lítið notað mannorð. Nokkuð flekkað - þarfnast viðgerðar og hreinsunar.
A.v.á.

Togarasjómenn athugið!

Dönsku blússurnar komnar. Margar stærðir.
Vélasala Einars.