Ég er að verða búinn að leggja lokahönd á nýtt skipurit fyrir Baggalút. Þetta hefur verið mikil vinna enda hef ég tekið viðtöl við alla starfsmenn auk þess sem ég hefi greint öll helstu vinnuferli hér hjá okkur. Ég hefi einnig ráðið til starfa nýjan starfsmannastjóra enda ótækt að jafn stórt fyrirtæki og Baggalútur hafi ekki slíkan. Hann heitir Hasra Ahkbal og hefur víðtæka reynslu á þessu sviði, var meðal annars liðsforingi í frönsku útlendinga hersveitunum. Einnig ætla ég að nota tækifærið núna um áramótin og skilgreina betur starfssvið hvers og eins, einkum ritstjórnarmeðlima. Vafalítið verða einhverjir sárir yfir breytingunum en ég er þess fullviss að endurskipulagningin mun gera fyrirtæki okkar enn sterkara á næstkomandi misserum.