Jæja, þá er maður kominn í kjólfötin. Við erum nefnilega að fara að taka við íslensku vefverðlaununum á Hótel Sögu á eftir.

Ég skil ekki hvaða formalítet það er að tilnefna aðra vefi en okkur, ég meina - lítum á:

• bb.is - einhvur fréttaþvættingur frá Vestfjörðum, efalítið upplogið og lítilfjörlegt eins og allt sem þaðan kemur - nema náttúrulega úr Hnífsdalnum
• liverpool.is - iss, að vísu leikur ekki vafi á að liverpúl er besta fótboltalið veraldar, en það er óþarfi að vera að hygla einhverjum bjórlepjandi stuðningsmönnum þeirra hér uppi á Íslandi
• flugfelag.is - HAHAHAHAHAHAHAHA
• hugi.is - hmmmm, eitthvað svona appírat fyrir börn og ellilífeyrisþega með minnimáttarkennd til að skiptast á skoðunum án þess að hittast

Við ætlum að hittast félagarnir á grillinu á Hótel Sögu fyrir afhendinguna. Númi þarf auðvitað að drekka í sig kjark og Myglar segir að hann fari aldrei í Bændahöllina án þess að borða lamb.

Sjálfur er ég temmilega rólegur. Ég segi strákunum auðvitað ekki frá því, en ég skilaði af mér 'upplýsingum' um þá félaga mína upp í Valhöll í gær. Þessar tilnefningar hafa ekkert með það að gera.

Ekkert.