Jæja, þá er ég loksins kominn aftur úr könnunarleiðangrinum í Botswana. Fátt merkilegt gerðist reyndar í ferðinni, þar sem í ljós kom þegar á staðinn var komið að ég átti í raun að vera í Burundi. Einhvers staðar á leiðinni hafa upplýsingarnar ruglast. En það þýðir lítið að sýta það, svona er þetta stundum.

Ég lagði af stað fimmtudaginn fyrir viku í svo miklum flýti að ég náði ekki að segja nema örfá orð við Enter um hvert ég væri að fara. Vona að hann hafi skýrt skyndilegt brotthvarf mitt fyrir hinum.

En nú mun lífið ganga sinn vanagang og allt verður sem áður. Það held ég að hinir verði hissa og glaðir að sjá mig þegar þeir koma aftur úr mat! Best að byrja á að hripa niður ljóðið sem ég samdi í ferðinni. Hvar ætli skrifborðsstóllinn minn sé? Nú eða þá skrifborðið?