Við í ritstjórninni brugðum okkur til Þingvalla um helgina. Það var sosum ágætisferð. Enter hafði meðferðis ein 12 kíló af humri sem við elduðum. Ég er samt ekki sammála þeim félögum Herberti og Myglari um að kúmen og aromat séu bestu kryddin fyrir slíkt hnossgæti. Enda átum við ekki nema 7 hala samtals. Spesi bjargaði reyndar kvöldinu með himbrimanum sem hann veiddi. Hann dulbjó sig sem húsönd, synti út í Þingvallavatn, greip himbrimann kverkataki og sneri hann úr hálsliðnum! Hann er mikill íþróttamaður hann Spesi eins og ég fékk að reyna er við glímdum á vatnsbakkanum fyrr um kveldið. Himbriminn bragðaðist prýðilega enda grillaður yfir birkieldi og kryddaður með lyngi, hreindýramosa og fíflarót.

Það skyggði nokkuð á ferðina að sjá Kaktuz lemja vitfirringana sem sátu sem fastast þegar við komum og neituðu að fara, í þeirri trú að bústaðurinn væri í raun þeirra eign. Greinilega elliær flón, Kaktuz lét þau finna til hnitspaðans og hótaði að reka krokketkylfu ofan í kokið á herranum (hahaha). Samt full harkalegt kannski, Kaktuz er maður framkvæmda, hann lætur verkin gjarnan tala.