Við félagarnir á ritstjórn brugðum okkur til Þingvalla yfir helgina. Dvöldumst við í góðu yfirlæti í bústað Kaktuzar við Þingvallavatn og skemmtum okkur dável. Rennt var fyrir silung, gripið í spil og leikið á gítar - mikið sungið.

Þetta eru bestu stundirnar, þegar við allir erum saman, lausir við eril borgarlífsins og áhyggjur hversdagsins; jafnvel Dr. Herbert var léttur í lundu og grillaði af miklum móð.

Auðvitað var ýmislegt sem betur hefði mátt fara. Það var óþarfi af Núma að hrinda Spesa ræflinum í vatnið bara fyrir að glutra niður nokkrum skitnum flugum og sjálfur hefði ég mátt hugsa mig betur um áður en ég faldi minkinn á kamrinum.