Ég lét mig hafa það að guða á imbakassann í gærkveldi þar sem tekið var viðtal við kennarann skelegga, Árna Johnsen. Árni hefur mátt þola margt undanfarið, t.d. hafa mannætur ítrekað reynt að veiða hann í þeim tilgangi að éta hann, sem mér þykir ekki skrýtið þar sem hann er afar vel byggður til manneldis. Svo gerði hann ekki nema 11 mistök sem þingmaður, 5 mistök og ekki mistök, 8 upplogin mistök, 2 mistök sem eru á misskilningi byggð og 1 mistök sem alls ekki eru mistök eða tengjast því máli sem hin mistökin tengjast, heldur allt öðru. Einnig hefur komið í ljós að þessi fyrrverandi þingmaður og ráðherraefni hafði ekki nema 10 þúsund krónur í mánaðarlaun! Tíuþúsundkall! Er nokkur furða að maðurinn geri 11 mistök? Svo biðst maðurinn afsökunar, þannig séð, en eru Íslendingar tilbúnir til þess að gefa þessum duglega manni sem engan hefur skaðað frið? Neinei, þeir heimta að hann kasti sér fyrir björg, ítrekað! Ég beini því til allra hugsandi manna, sérstaklega mannæta í blaðamannastétt, að hætta nú að leggja höfðingjann Árna Johnsen í einelti, hann hefur mátt þola nóg; hann hefur þurft að vera Árni Johnsen í sextíu ár!