Ég átti prýðilegan fund með Pemisi og Kaktuzi í gærkveldi. Við héldum okkar reglulega fræðimannakvöld á veitingahúsi hér í bæ þar sem við reifuðum nýjustu kenningar okkar. Pemis er með ansi merkilega kenningu um kynferðislegt aðdráttarafl sauðkindarinnar, sem ku eiga sér efnafræðilegar orsakir. Kaktuz fór vítt og breitt um svið tungumálaverkfræði, sem hann er að kynna sér þessa dagana. Ég kynnti fyrir þeim líffræðilegan bakgrunn asparseitrunar, sem getur verið mjög skæð, sérstaklega þegar um niðursoðinn aspars er að ræða. Þetta var prýðileg kvöldstund sem við lukum svo með spássitúr niður Laugaveg, Bankastræti, Austurstræti og yfir Ingólfstorg. Þar var mikið fjölmenni, eins og endranær og miðborgin iðaði af mannlífi.