Ég verð að segja að mér finnast skrif samstarfsmanna minna hafa verið full óábyrg upp á síðkastið, eins og raunar hegðan þeirra öll. Svo virðist sem ritstjórnarmenn séu meira og minna fullir allar helgar og sumir inni í miðri viku líka, jafnvel um hábjartan dag. Slíkt er að sjálfsögðu óhæfa, en öllu verra er þegar brotamennirnir eru farnir að stæra sig af hegðaninni hérna á síðum Baggalúts. Drykkjusjúklingurinn og ógæfumaðurinn Indriði Gripsson, sem einungis getur sinnt hlutastarfi hér við listgagnrýni sökum veiki sinnar, lætur sér ekki detta í hug að láta á því bera í skrifum sínum. Ritstjórnarmeðlimirnir, aftur á móti, hika ekki við monta sig af drykkjunni og eru minni menn fyrir.

Númi Fannsker, sem eitt sinn var nefndur "ástsælasti fræðimaður þjóðarinnar" í áramótaávarpi útvarpsstjóra, er farinn að láta áfengið hafa slík neikvæð áhrif á verk sín að síðast nú í dag ruglaði hann taflmönnum saman við skákmenn. Nema hann hafi ef til vill í raun og veru verið að tefla við taflmann, það kann að skýra hvers vegna hann náði að vinna svona oft. Enter og Spesi sólunda einnig hverri helginni á fætur annarri í drykkjuna. Maður sér strax á fimmtudögum að skjálftinn er kominn í þá og það sést einnig í gegnum skrif þeirra, lesendum til tjóns.

Því hvet ég félaga mína í ritstjórn til að taka sig saman í andlitinu, einbeita sér að vinnunni og hætta drykkjulátunum. Við eigum skyldum að gegna við æsku þessa lands.