Þá er maður loks laus úr prísundinni og kominn í geðugra húsnæði fjarri erkifjendum og iðnaðarnjósnurum. Ekki það að neinn hafi svosem tekið eftir því að mér var rænt og haldið nauðugum viljugum í viku á einhverri eyðieyju í miðju Atlantshafi. Pyntaður og yfirheyrður daginn út og daginn inn. Tók mig 3 daga að synda til meginlandsins eftir að mér tókst að flyja þessa Reuters fanta. Sökum ákafra ofsókna verður nýju aðsetri höfuðstöðva Baggalúts í útlöndum haldið leyndu fyrst um sinn. Ekki það að þessari bölvuðu ritstjórn á Íslandi sé ekki skítsama. Þeir neituðu þrívegis að greiða Reuter lausnargjald. Skelltu bara á að því er mér var tjáð. Hvað um það. Dagurinn í dag boðar kaflaskil. Nýtt umhverfi og næði til rannsókna. Ég ákvað að halda upp á daginn með því að sækja um einkaleyfi á notkun túrtappa sem lyf við niðurgangi. Ég er bjartsýnn á framhaldið.