Mér varð það á í gærkveldi að opna fyrir sjónvarpið, nánar tiltekið fréttirnar sem oftast valda mér óbærilegum leiðindum. Þar þuldi Elín Hirst upp fregnir af japönskum vísindamönnum sem hyggjast hefja hvalaeldi í sjókvíum. Þarna yrði þá komið fyrir hvölum af ýmsum tegundum, sérstaklega hinum meðfærilegri, eins og t.d. hrefnum og þeir aldir eins og hverjir aðrir fiskar.
"Húrra!" hrópaði ég upp yfir mig og hugsaði: "loksins hefur einhver tekið af skarið um að framkvæma þessa snilldarhugmynd sem ég hefi reyndar margoft lagt til við íslensk stjórnvöld". Sjáið nú fyrir ykkur íslenskan fjörð, eins og t.d. Hvalfjörðinn (hahaha), þar sem komið væri fyrir í kvíum þúsundum hvala! Skapa mætti fjölmörg störf við að fæða skepnurnar og svo slátra þeim í gömlu hvalstöðinni. Ferðamannastraumur myndi aukast og líf glæðast á nýjan leik í Hvalfjörðinn. Ég vil hvetja alla sem annt er um þjóð sína og rætur að fylgjast nú vel með frændum vorum japönum, sæta lagi og hefja undirbúning að endurreisn hvalaiðnaðar á Íslandi!
Ég er ekki frá því að ég hafi loks fundið svokallaða heildarlausn. Gott ef hún er ekki alhliða. Ég hef sumsé fundið lausn á húsnæðisvanda listaháskólans – og almennum vandræðum Strætó að auki.
Hugmyndin er einfaldlega sú að flytja listaháskólann í strætó – eða strætóa nánar til tekið. Hægt væri að troða einum kennara í hverja leið, einum góðum myndvarpa – og svo auðvitað nemendum. Leið þrjú gæti verið fyrir trúðanemana, leið fjögur fyrir föndurdeildina, leið fimm fyrir prjóna- og hannyrðadeildina, leið 14 fyrir . Og þar fram eftir götunum, bókstaflega.
Lausnin er frábær vegna þess að:
1. Hún er flippuð.
2. Það er hvorteðer aldrei neinn í strætó.
3. Það er ókeypis fyrir nema í strætó.
4. Almenningur fengi að fylgjast með tímum, bæði utanfrá og einnig innanfrá, gegn sanngjörnu gjaldi.
5. Listnemar geta stokkið inn og út úr tíma, eftir flippþörf.
6. Ekki þarf að byggja sérstakt hús undir flippnámið.
7. Strætó fengi fullt að peningum, sem annars færu í að byggja og halda við flipphýsinu.
8. Listnemar eiga ekki bíl.
9. Hún er hagkvæm, einföld og framkvæmanleg – í alvöru.
10. Hún er sjúklega flippuð.
Ég legg hér með til að þessi alhliða heildarlausn verði framkvæmd, eins og sagt er, tafarlaust.
» Sálmar | » Gagnrýni | » Sögur | » Leikrit | » Siðir | » Heimsljós
