Lesbók11.04.07 — Enter

Vill einhver vera svo vinsamlegur að fræða mig um ástæður þess að á Íslandi þrífast ennþá bændur?

Til hvers í daunmylguðum déskotanum að hafa þetta taðtyggjandi hyski hokrandi í sínum líttmáluðu, illa girtu hreysum fyrir augum heiðvirðs fólks þegar það ekur um land sitt?

Það er ekkert rómó við það. Ekkert fagurt, ekkert gott. Ekki neitt!

Einhverskyns misskilningur virðist uppi um að þessi daunillu náttröll sem teppa þjóðvegi landsins með sundurryðguðum traktorum sínum og beita óseðjandi skepnum sínum á hvern óafgirtan kvist sem hættir sér upp úr hrjóstrugri moldinni - þjóni einhverjum tilgangi. Jafnvel sé þetta skellepjandi pakk svo mikilvægt afkomu og heill þjóðarinnar að það beri að styrkja með opinberu fé.

Fyrr má nú forheimskan vera.

Hví að vernda þessa lopaklæddu steingervinga með himinháum innflutningstollum. Hvað í táfýldum takkaskóm er verið að vernda? Hið íslenska bragð?

Segið mér sanntrúaðir: Hefur einhver ykkar bragðað allar heimsins rollur og borið saman? Eru norskar kindur eitthvað verri á bragðið? – eða þær áströlsku?

Mér er það til efs. Rolla er rolla - og bragðast næstum nákvæmlega eins og rolla - hvort svo sem hún er í sveit sett á Honólúlú eða í Hrunamannahreppi.

Og rollum, jafnt sem nautgripum, hænsfuglum, svínum, má slátra hvar sem er og skófla hingað í frystigámum - tilbúnum til átu. Það sama á raunar við um ýmsar aðrar gómsætar skepnur sem ekki fá þrifist hér við heimskautið, en ekki fást innfluttar hingað nema gegn okurverði - þá helst niðursoðnar.

Sumir eru einnig haldnir þeim ókennilegu ranghugmyndum að bændur hafi eitthvað með allar fínu innpökkuðu landbúnaðarvörurnar í búðarhillunum að gera.

Onei. Þeirra eina, dapurlega hlutskipti er að halda líftórunni nógu lengi í sínum aumu skepnum að réttlætanlegt sé að slátra þeim. Svo skríða þeir aftur ofan í sófan og ráðgera næstu sníkjur.

Hvers kyns skyrbúðinga, ísmeti og osta má allt eins vinna hér úr danskri kúamjólk, franskri - eða norður-kóreskri ef því er að skipta. Henni má hæglega fleyta í þúslítravís yfir hafið. Og svo má auðvitað líka bara fá þetta hingað tilbúið. Það væri hreint ekki verra. Hvernig væri að láta á það reyna, tolla og haftafrítt, hvort íslenskur grámygluostur geti með góðu móti keppt við senegalskan antílópuís á frjálsum markaði?

Málið er að við höfum ekkert með bændur að gera. Höfum aldrei haft. Útlendingar eru hér sem víðar ágætur mælikvaðri, því þeir vilja ekkert fá frá okkur sem þeir hafa sjálfir – betra. Útlendingar vilja fiskinn okkar, peingana okkar, jafnvel tónlistina okkar. Ekki gúllasið okkar.

Já, þessir voluðu vesalings bændur.

Það á að smala þessu flórliggjandi blóðsjúgandi hyski öllu saman og skikka það í alvöru vinnu. Til að mynda við uppgræðslu og endurheimt landsins sem það er svo samviskusamlega búið að búið að berstrípa, framræsa og þúfuslétta gegnum aldirnar.

---
Og ef einhver vill endilega halda skepnur, til skemmtunar ellegar slátrunar, þá er alger óþarfi að sólunda fögrum högum landsins í viðlíka hégóma – það má hæglega gera t.d. í Mjóddinni, eða í Garðabænum og þá án allra styrkja – og bænda.

 
Enter — Forystugrein
 
Enter — Forystugrein
 
Enter — Sálmur
 
Númi Fannsker — Forystugrein
 
Enter — Sálmur
 
Spesi — Forystugrein
 
Númi Fannsker — Forystugrein
 
Enter — Forystugrein
 
Enter — Forystugrein
 
     1, 2, 3 ... 180, 181, 182