Lesbók29.09.05 — Enter

Fyrr má nú vera raunveruleikinn sem þrýst er inn í stofur landsmanna með þessum nýja piparkökuþætti á Skjá Einum, Leitinni.

Fyrirmyndin er jú amerísk, þar sem kísilfylltar, graðholda túrbódruslur bítast slefandi um forríka og fjallmyndarlega piparkarla þar til ein stendur eftir og fær jafnt prinsinn sem hálft konungsríkið.

Býsna raunverulegt allt saman.

Þessi sérdeilis sannfærandi veruleiki milljónaþjóðarinnar er svo færður hingað með manni og mús, á apaplánetuna Ísland. En svei, í stað stútmynntra glansglyðra er hér boðið upp á rassíðar, lampakrumpaðar heimasætur - álíka lostahvetjandi og ofnbakað karfaflak.

Þeim er svo ætlað að koma flögufitugum puttunum yfir rammíslenska piparkarla, sem sannarlega er ekki sársaukalaust að hrópa húrra fyrir. Þvílík samansafn landeyða og lyddna. Þó aðeins hafi fyrsti skammtur auðnuleysingja verið kynntur í fyrsta þætti, er nokkuð ljóst hvert stefnir. Í plebb. Á bólakaf í plebb.

Fimbulþyrmandi, fárveikjandi og fyrirlit­legur plebbismi. Lágkúra. Rusl.

Það hvarflar ekki að þessum okkar öfugyggðu þáttargerðamönnum, íslensku, að hugsanlega sé ekki allt sem sýnist í amerísku raunveruleikasjónvarpi. Að hugsanlega sé ástæða fyrir því að ekki veljast einvörðungu gistenntar slordísir í kvennafansinn. Að hugsanlega þurfi meira en erfingja dekkjaverkstæðis Dúdda til að halda íslenskum dramafíklum við skjáinn. Sveiattan.

Halda þessir staðdeyfðu vesalingar virkilega að íslenskur samdráttar­raunveru­leiki sé hæfur til sýninga fyrir alla aldurshópa - í opinberum byggingum?! Onei.

Þetta er bara ógeðslegt. Þjóðin hefur ágætan aðgang að heilu Interneti fullu af viðbjóði sem þessum - hlífið sjónvarpsviðtækjunum okkar við svona löguðu.

Og í öllum guðsalmáttugs bænum snúið bannsettu Ástarfleyinu aftur í höfn áður en það siglir Íslenska Sjónvarpsfélaginu endanlega á kaf í sorann.

 
Kaktuz — Saga
 
Kaktuz — Sálmur
 
Númi Fannsker — Sálmur
 
Fannar Númason Fannsker — Forystugrein
 
Númi Fannsker — Forystugrein
 
Númi Fannsker — Forystugrein
 
Númi Fannsker — Forystugrein
 
Númi Fannsker — Sálmur
 
Enter — Forystugrein
 
Númi Fannsker — Forystugrein
 
        1, 2, 3 ... , 180, 181, 182