Hvað sjá þessir útlendingar eiginlega við þessa skvaphúðuðu hlemmibévuðu hvali? Þessar afmynduðu og ofvöxnu fljótandi beljur sem engan tilgang hafa og engum eru til gagns.

Hvað fær fólk til að hópast á einhverjar velgjuhvetjandi útsýnistrillur í þeirri veiku von að sjá eitt ferlíkið villast upp á yfirborðið? Og hvað fær fólk til að vilja vernda þennan ófögnuð?

Til hvers?

Einhverjir halda því fram að þetta sé svo skynugt. Þvaður. Þessi útbelgdu fitukeppir, sem sátu eftir þegar restin af spendýrunum komu sér á þurrt , geta ekki einu sinni bjargað sér út úr heilu fjörðunum villist þeir þangað.

Aðrir vilja meina að þessi grey séu í útrýmingarhættu. Þvættingur. Sé miðað við rúmmál eru þessi gerpi í einna bestu málum allra spendýra, enda þarf ekki nema eitt kvikindi á móti hverjum heilum mörgæsastofni svo dæmi sé tekið.

Það eina sem ég sé athugavert við að murka líftóruna úr öllum þessum lýsisfylltu hnísum, hrefnum og reyðum er að allt er þetta gersamlega óhæft til átu.

En það má þá alltaf hola þetta helvíti innan og nýta sem þjóðvegasjoppur, biðskýli ellegar kamra.

Túristarnir ættu að fíla það.