Breskir dónakarlar völdu á dögunum leikkonuna snoppufríðu Evu Longoriu þá kynþokkafyllstu í heimi.
Þessi smágerða Texasmær, sem varð þrítug fyrr á þessu ári, hefur sannarlega skotist hratt upp stjörnuhvolfið og er þar helst um að kenna frammistöðu hennar í þáttunum um eiginkonurnar aðþrengdu, sem einmitt eru í miklu uppáhaldi hjá ritstjórn Baggalúts.
Það kom mér ekki á óvart að hún Eva mín skyldi rúlla yfir aðrar draumheimadrottningar í þessu kjöri því ekki er öfsögum sagt að skjárinn hreinlega ljómi upp þegar hún trítlar um fyrir framan myndavélarnar ellegar stútsetur þrýstnar varirnar og dillar straumlínulöguðum lendunum framan í heimsbyggðina.
Helst að hún minni á blessunina hana Victoriu Principal á velmektarárum Dallass — nema hvað Gabrielle í seiðandi túlkun Evu er vissulega ólíkt ástríðufyllri, tilkippilegri og útsjónarsamari en hin hreinlynda Pamela.
Baggalútur óskar henni Evu sinni hjartanlega til hamingju með að hafa loks hlotnast sú viðurkenning sem henni ber og vonar svo sannarlega að hún nái að fóta sig á hálli braut frægðarinnar og fái tiplað léttklædd og litfríð um skjái og skerma heimsins um ókomna framtíð.