Ég má til með að vekja máls á því, einn ganginn enn, hversu brýnt það er að hér á landi rísi opinber stjörnusambandsstöð.

Þrátt fyrir góðan skilning ráðherra umhverfis- samgangna og félagsmála á þessum málum og brennandi áhuga ýmissa stjórnmálaleiðtoga á samskiptum við aðrar lífstjörnur - hefur ekkert gerst í þessum málum af viti síðan Sambandið var og hét.

Fullkomnasta sambandsstöðin er enn gamla fjarskiptahúsið við Suðurgötu - og er það löngu orðið úrelt. Kóbalthjálmarnir fjórir sem þar eru draga varla út fyrir sólkerfið og skráning og móttaka gerkosmískra gagna er í algerum ólestri.

Því hlýt ég að skora á ráðamenn að beita sér í þessum málum - hið snarasta.

Ég bendi enn og aftur á nýtingu Perlunnar í þessum tilgangi en hæglega mætti fylla tanka hennar af því feiknarlega magni kóbalts sem féll til við gerð Vestfjarðaganganna - og náð þannig því stórkostlega sambandi sem nauðsynlegt er til að fleyta mannkyni öllu áfram í næsta tilvistarþrep.