Æi - hvað eru menn að halda þetta upp á 100 ára afmæli heimastjórnarinnar? Þessi 'tímamót' sem engin eru. Einhvernveginn fær maður á tilfinninguna að Júlíus Hafstein hafi vantað eitthvað að gera og þessvegna hafi verið ákveðið að stofna eins og eina nefnd og leggja til einn peningapoka til að minnast atburðar sem öllum er sama um, nema einhverjum snobbrössum í forsætisráðuneytinu og vinum þeirra sem fá að sitja í nefnd og kalla hvern annan 'herra formann' og 'herra varagjaldkera'. Æi - mér finnst þetta bara asnalegt.

Og hvernig er afmælinu svo fagnað? Er skrúðganga? Flugeldasýning? Eða yfirhöfuð nokkuð sem talist getur áhugavert fyrir venjulegt fólk?

Onei - að vísu var opnuð heimasíða sem að langmestu leyti fjallar um Hannes Hafstein, en annars eru þetta einhverjir kokteilar og kransaálagninar þar sem snobbhanarnir fá að belgja sig hver framan í annan og kalla 'skál' og 'ja det er dejligt'.

Hugsið ykkur, fyrir þessa peninga hefði mátt reisa myndarlega styttu af Vigdísi Finnbogadóttur á Austurvelli.