Hvaða erkibjálfi var það sem taldi fjölmiðlum trú um að venjulegt fólk úti í bæ nennti að heyra og lesa samræður og umfjöllun um viðskipti og fjármál? Hví í berrössuðum blámanum get ég ekki opnað fyrir útvarp eða flett blaði án þess að þurfa að sitja undir áróðri og spekúlasjónum sjálfskipaðra fjármálavitringa og viðskiptakverúlanta? Halda fjölmiðlamenn að þetta sé skemmtilegt? Í alvöru?

Mér gæti bara ekki staðið meira á sama um þetta oflofaða hobbý teinjakkaðra eróbikkandi vindbelgja sem þegar allt kemur til alls vita ekkert í sinn krembrúna haus.

Hvernig væri nú t.d. að gera hressilegan útvarpsþátt um Hávarðar sögu Ísfirðings? Nú eða skrifa hnitmiðaða upplýsandi blaðagrein um beinkröm.

Hættið að minnsta kosti að sóa tíma venjulegs, vinnandi fólks.