Mikið var ég stoltur þegar ég eignaðist fyrsta sparibaukinn minn. Hann var silfursleginn, í líki glaðlynds stokkandarunga - með fölbláan trefil og skotthúfu í stíl.
Mikið var ég rogginn þegar ég fór í fyrsta skiptið með sparibaukinn minn í bankann - taldi úr honum túkalla, krónupeninga og allnokkra aura - meir að segja 10 krónu seðil - og lét leggja inn á gullslegna sparibók.
---
Og mikið verð ég illur þegar ég nú horfi upp á baukagerðarmennina svolgra í sig landið mitt með öllum þeim fimmeyringum, túköllum og tíukrónuseðlum sem þjóðin hefur í einfeldni sinni fært þeim úr silfurbaukum sínum.