Afkaplega er ömurlegt að heyra endalaust af þessu dópjapli fólks.
Lögreglan er sí og æ að hirða e-pillur og avítamín af einhverjum smákrökkum, rífandi taðvafninga út úr húsfreyjum og snýtandi upplyftiduft úr nösum einhverra lampaleginna uppskafninga.
Leiðist fólki svona óskaplega? - er svona leiðinlegt í sjónvarpinu? Þarf virkilega að belgja sig út af eitri og deyfiefnum til að skjögra gegnum hversdaginn?
Bull.
Í guðanna bænum. Af hverju farið þið ekki í sund? spilið á spil eða bakið pönnuklökur? eða dansið hvert við annað?
Hvað er betra en að dansa?
Allt er betra en þetta.
Ég varð óþægilega var við það í gærkvöldi á heimili mínu, að brauðið var búið.
Þetta þýddi það að annað hvort sylti ég heilu hungri eða ég klæddi mig upp og keypti meira brauðmeti, þó félítill væri með afbrigðum.
Veður var afleitt en ég harkaði af mér og öslaði í nístingskulda að hverfisverslun minni vongóður um æti.
En svei þeim hundingjum sem þar ráða ríkjum, það var þá búið að loka.
Heldur þótti mér heimurinn því harður þegar ég lagðist til svefns, saddur af kexkruðeríi og ostbita - en svikinn um mitt daglegt brauð.
---
Mér varð hugsað til þessa þegar ég í dag frétti að íbúar Norður-Kóreu eiga við nákvæmlega sama vandamál að stríða.
Nákvæmlega það sama.
» Sálmar | » Gagnrýni | » Sögur | » Leikrit | » Siðir | » Heimsljós
