Nú á enn eina ferðina að fara að setja sauðfjárbændur á höfuðið.
Bankar og aðrar valdastofnanir hafa af einhverjum ástæðum tekið til við að framleiða kjúklinga- og svínakjöt af miklum móð og demba því svo yfir viðskiptavini á svo lágu verði að það getur einungis talist árás á heiðarlega sauðfjárbændur, en eins og skyni bornir menn vita ruglast almúginn oft á þessum gerólíku framleiðsluvörum. Það blasir ekkert annað en gjaldþrot við bændum um allt land ef þeim er ekki tryggður markaður fyrir framleiðsluvöru sína, svo ljóst má vera að hér verður ríkisstjórnin að grípa inn í.
Ég hvet því þingmenn og ráðherra Framsóknarflokksins til að grípa skjótlega til eftirfarandi aðgerða:
- Styrkir til sauðfjárbænda verði auknir.
- Lágmarksverð verði sett á kjúklinga- og svínakjöt, svo að framleiðsla sauðfjárbænda sé samkeppnishæf.
- Hver fjölskylda í þéttbýli verði skilduð til að kaupa svo sem eins og 5 kíló af kindakjöti á viku. Slíkt kæmi sér ekki einungis vel fyrir bændur heldur myndi það bæta heilsu og almenna líðan neytenda til muna.
- Sjósókn verði bönnuð og vistarband tekið upp á nýjan leik, til að tryggja bændum vinnuafl á sanngjörnu verði og auka á nýjan leik hróður sveitanna.
Þá er heimsbyggðinni ógnað enn eina ferðina, að þessu sinni hvorki af kjarnorkuvetri, loftsteinahríð né ósonhvarfi - heldur nokkru enn skelfilegra - nefnilega flensu.
Ójá. Það er sannarlega herfilegt tilhugsunar að jarðvist okkar ófleygu hárleysingjanna skuli eftir allt púlið, alla okkar sigra, endanlega stefnt í voða af ógnvænlega illvígri ... flensu.
Úff. Hvað varð eiginlega um flottu sjúkdómanöfnin? Svarta dauða, ebólu, eyðni, kóleru, malaríu? Almennilegar plágur og drepsóttir með flott og krassandi nöfn. Alvöru pestir sem maður þarf ekki að skammast sín fyrir að smitast af.
Kommon. Jafnvel rauðir hundar og gubbupest hljóma illvígari en ... flensa.
Og svo kallast þetta fugla-flensa í þokkabót. Algerlega glatað. Það geta ekki verið sturlaðir úlfar, blóðþyrstir vampírar eða vænisjúk skordýr sem bera þetta með sér. Neinei. Hænsn og farfuglar takk fyrir.
Maður getur rétt ímyndað sér skelfinguna sem mun grípa um sig þegar fyrsta lóan rennur í hlað næsta vor. Kjallarar fyllast af dauðskelfdu fólki klyfjuðu dósamat sem skiptist á hryllingssögum af sýktum álftum og illviljuðum spóum sem laumast inn í hýbyli fólks að næturlagi og drita í seríósið.
—
Já það er víst eins gott að fara að birgja sig upp af lýsi og köttum, skríða ofan í kartöflugeymslu og hafa hægt um sig næsta áratuginn eða svo. Standa af sér hörmungarnar. Ég get hreinlega ekki afborið þá tilhugsun að falla í fuglaflensunni miklu.
Það er einfaldlega of niðurlægjandi.
» Sálmar | » Gagnrýni | » Sögur | » Leikrit | » Siðir | » Heimsljós
